“भवो ही लोकाभ्युदयाय तादृशाम्” या कोटीतील जे वैदिक धर्मोद्धारक महात्मे असतात, सर्वस्वी त्यांच्या महात्म्यावरच मानवांचा ऐहिकामुष्मीक अभ्युदय अवलंबून असतो. अशा तऱ्हेने महात्म्य अपरोक्ष आत्मसाक्षात्काराने प्राप्त होते. कारण आध्यात्मज्ञानाइतके शाश्वत, पवित्र व सर्वश्रेष्ठ असे दुसरे कोणतेही ज्ञान नाही. भगवान श्रीकृष्णानेही “आध्यात्मविद्या विद्यानाम्” असा गीतेत या विद्येच्या सर्वश्रेष्ठत्वाचा उल्लेख केला आहे.  

श्रीमत् जगद्गुरू विद्याशंकरभारती स्वामी करवीर पीठ हे वयोमानानुसार निवृत्त झाले आणि या पीठाचे नूतन शंकराचार्य म्हणून श्री. यशवंत काशिनाथ कुलकर्णी, शिरटीकर यांची निवड गुरुशिष्य परंपरेनुसार विद्यमान जगद्गुरू श्रीविद्याशंकरभारती स्वामी यांनी केली आहे. ते आता या पीठासनावर श्रीविद्यानृसिंहभारती या नावाने शंकराचार्य म्हणून कार्यरत आहेत.

“धर्म एव हतो हन्ति-धर्मो रक्षति रक्षित:” तुम्ही तुमचा धर्म सोडला तर तुमचा विनाश अटळ आहे. तुम्ही जर धर्माचे रक्षण प्राणपणाने केले तर धर्म तुमचे रक्षण करेल. प्रत्येक भारतीयाने, आपले जीवन वरील सूत्रानुसार व्यतित करावे व धर्म “तेजस्वी” करावा अशी अपेक्षा आहे.